Deu 6 | ZomZIV | STEP | Hih thupiakte, thukipte le thukhamte, note in Jordan kantanin na lak ding uh gamah na zuih dingun kong hilh dinga TOPA note Pasian hong piak ahi hi.

Deuteronomy 6

TOPA Note Pasian It Un

1 Hih thupiakte, thukipte le thukhamte, note in Jordan kantanin na lak ding uh gamah na zuih dingun kong hilh dinga TOPA note Pasian hong piak ahi hi. 2 Tua in note le na tate uh le amau khita suak a tate uh tawh hih kong piak thukipte le a thupiakte zui-a TOPA note Pasian kihta in na nuntak uh sawtpi nuam nasak nading uh ahi hi. 3 Israel aw za un, na pate uh Pasian TOPA in hong ciamsa bang tektek in bawngnawi le khuaizu a luanna gamah tampitak pha a nuam na sak theih nadingun thu na man ding uh limtakin ngaihsun un.

4 Israel aw za in: TOPA eite Pasian, TOPA in khat ^{▼▼6.4 Ahikeh eite Pasian TOPATOPAahikeh TOPATOPAahikeh TOPATOPA} ahi hi. 5 TOPA note Pasian na lungsim khempeuh, na hinna khempeuh na hatna khempeuh un it un. 6 Tuni-a kong piak hih thupiakte na lungsimun vom un. 7 Na tate uh limtakin ciamtehsak un. Inn ah na om uh ciang; lam na pai uh ciang, na lup uh ciang, na thawh uh ciangin amaute genpih un. 8 Tuate na khutuah lim bangin hen unla na taltang uah suang un. 9 Na inn kongkhuamte le na kongpite uh tungah tuate gelh un. ^b

10 TOPA note Pasian in na pate uh, Abraham, Isaac, le Jacob tungah note piak dinga a ciamsa gam - gamzaipi, note phuh loh a etlawm mahmah khuapite, 11 note khol loh na hoih khempeuh tawh a dim innte, note tawh loh tuikhukte le na suan loh uh lenggui le olive huante omna ah hong puakin - tuate ne a na kham uh ciangin 12 salsuahna gam Egypt pan hong paikhiatpih TOPA na mangngilh khak ding uh kidawm un. ^c

13 TOPA note Pasian kihta unla ama na bek semin ama min ah kiciam un. 14 Note kim-a om midangte’ pasiante nung zui kei un; 15 na zuih uh leh note laka om TOPA note Pasian a aam Pasian hi a, a hehna in note hong kangin, lei maitang panin hong susia ding hi. 16 Massah a na hih bangun TOPA note Pasian zia-et kei un. 17 TOPA note Pasian thupiaknate ngeinakipte le thukipte limtakin zui un. 18 Note adingin a hoih nading le TOPA kiciama na pute uh tunga a ciam gam hoih na luah theih nadingun TOPA muhna ah a hoih le amaanin gamta unla, 19 TOPA gensa bangin na mai-ua galte khempeuh tuancilmang un.

20 Mailam hunah na tapate un, “TOPA note Pasian in hong thupiak, ngeinakipte thukipte le thukhamte bang a deihna hiam?” ci-a hong dot uh leh 21 amaute tungah: “Eite Egypt ah Pharaoh salin i om a, ahi hangin TOPA in khut thahat tawh hong paikhiatpih hi. 22 TOPA in eite mitmuhin alian, a lauhuai - a piandang limte le alamdangte - Egypt tung, Pharaoh le a innkuan buppi tungah a tungsak hi. 23 Ahi hangin amah in kiciama i pute tungah piak dinga a khapsa gamah hong puak dingin tua lai panin hong paikhiatpih hi. 24 Eite a tawntungin daupai-a tuni-a bangin i nuntak theih nadingin hih thukipte zui a, TOPA eite Pasian i kihtak nadingin TOPA in thu hong pia hi. 25 Ama hong thupiak bangin TOPA eite Pasian mai-ah hih thukham zuih ding i thupi sim leh, tua in eite thumaanna ahi ding hi,” ci-in gen un. ^d